2003 眾融頻道 not my channel – 蘊釀至啟播紀錄

眾融頻道not my channel
蘊釀至啟播紀錄

nmc logo

not my channel logo 眾融頻道

電視台有好多種睇法,眾融頻道 not my channel。
小學果時唔見左本手冊,眾融頻道 not my channel。
都拍到唔知拍乜好,眾融頻道 not my channel。
唔好當我地冇到,眾融頻道 not my channel。
以無道為我道,眾融頻道,channel of the channelless,not my channel。
題材唔老土,眾融頻道,not my channel
都唔知講乜好 ,眾融頻道,not my channel
條片剪極都未剪好 , 眾融頻道 not my channel
頭巾榮你咪收山唔o路 , 眾融頻道 not my channel
Parkson 幾時出黎旺角o鋪 , 眾融頻道 not my channel

一個星期日的午後,無所事事獨個兒在旺角鬧市中浪蕩。心裹總覺得想找著些甚麼,但又說不出一個所以然。想著走著,週遭的人群及都市的聲遂漸疏遠,不經不覺間進入了那無坦的自我虛空之中,但又總有一點說不出的不是味兒。唔…………………倒不如去登打士街來一杯苦澀但郁香的黑咖啡。心意既決,曾眼一看,原來已踏進西洋菜街。心想,也好,順路看看這條走了年多兩年的路今天又是怎樣一個光境。

星期日的西洋菜街依然好不熱鬧,除了各式各樣的商品推銷站外,這邊廂一個街頭基督教會聚會,那邊廂一個前線的倒董簽名街站。果然各行其是,百花齊放。但再想之下,這是否已是百花齊放呢?其實,暫時見到的都只不個是那些有名有姓在花譜上有一定位置的才會在這裡展示她的姿態。何時,那些名不見經傳甚或無名無姓的野花才會遍地開滿呢?回想之前年多兩年的時間的街站對公共空間的探討,的確展示了一定的可能性。但就開初提出希望引發個體層面於公共空間中自覺自主的積極投入之渴望,直至現時為止仍只交出白卷一份。同時,現時的情況在頗大程度上更強化了那種社會上對專業代理人的迷思。亦同時強化了弱勢者滿足於那種無須持續投入又仍可獲得的渲洩性快感。究竟這一切是否只不過好心做壞事呢…………………?

一股鬱悶的感覺不期然壓住胸口。拿出烟絲想著舒一舒悶氣,於是就在路上前線的街站旁卷了一枝散發著雲呢嗱香味的烟卷。取出我的Zippo打火機,叮聲一響,刷出了火花。正想深深吸一口濃香,才發覺原來火花過後並未能燃起火種。心底湧起一股煩躁,怎麼總要在這種時候戲弄我呢?口中掛著烟卷喃喃自語之際,突然眼前一亮,一點火種就在我眼前亮起。亦顧不了甚麼,就踏前一步點燃了烟卷,深深吸入一口濃香。呼出一口悶氣,張眼一看回頭四看卻又看不見是誰在這時候燃起火種。正納悶之際,耳旁傳來一把既遠亦近又熟悉的聲音:「The struggle itself towards the height is enough to fill a man’s heart. One must imagine Sisyphus happy…………………Then, are you happy?」會心微笑下,我只答了一句:「明白啦,魔鬼!」因為我知道我這個無形相的老朋友,水仙孽子,並不是真的在問我一個問題。衪只不過又一次在我墮入漆黑之中的時候為我再一次燃起那點可照亮前路的火種。「In the midst of death; life persists, in the midst of untruth; truth persists, in the midst of darkness; light persists.」

言歸正傳,當初同P同怡傾o既初步構思,係將錄影力量年度計劃中(但現時無人 take up )的街頭放映活動結合正須再求突破的街站向公共空間的探索再進一步。當日傾過的諗法係結合街站的廣播經驗同錄影力量的軟硬資源設立一個每週於西洋菜街運作的視像廣播台。開始階段,廣播內容會倚靠相熟友群中人製作的短片,希望確立位置及可行性後再在更闊層面上邀請其他朋友及團體提供他們有興趣以此型式展示的短片。再進而廣開門路歡迎任何朋友提供他們自己的影片於廣播台播出。但由於我們自己的確是有立場有睇法,亦無須服務於那種理性主義建構出來的客觀中立迷信;同時,我亦未必樂見任何的態度都會在這廣播台上出現,所以須考慮保留最後選擇的決定權。另一方面,為了突出廣播台在那時那刻出現的重要性及建立參觀者週期性於那時那地觀看的習慣,所以希望能造到每一次內容都有一段有時間性與當前社會關注點相關的專輯。亦曾想過為迴避電檢及警方因而容易介入窒礙廣播進行的問題,一些涉及性及暴力的片段可能在開初階段需要小心策略地以比較不佔太多時間地滲透式處理。而總體的初步想像為:一個小時的節目內容,分為專輯部份及其他短片部份,各佔半小時而這個一小時的節目內容則會連續播出兩次成為一個兩小時的廣播台街站。由於運作一個每週出動的街站在在須人,更加上每週出片,持續投入的人手就更加重要。由於希望可有更多朋友會投入其中,而投入的其中一個重點就是參與決策,所以,以上所有構思都只是構思而必須再被討論。

因希望可先確立可幫忙剪片的技術核心(這實在是我和P的無能項目)所以先約了菲和明傾,希望他們有興趣投入於這計劃之中。但約會當晚,透過菲口中,得知明這段時間對錄影興趣不大,反而希望多花時間在畫作上。無心插柳,碰巧那晚仁同森都在八樓而他們都表示有興趣參與,所以除菲外多了兩位。之前的初步想像亦已在討論中提出,雖未能完全磨合,但因覺人手仍未充備,所以暫且按下,容後再作討論。會中大家分別提出了希望聯絡榮,阿C同薯邀請他們投入參與。聯絡工作分頭進行。

又一個獨行浪遊的週末午後,口中迴盪著甘味不俗但郁香不足的黑咖啡。眼睛凝視著杯中啡黑及飄過其上的一縷雲呢嗱濃香,又想起了廣播台的問題。雖說保留最後的決定權情理俱備,但想深一層,這般作為會否只不過是嘗試確立一個帶著我所喜歡的立場但仍有偏見的媒體與現時我所不喜歡的大路媒體立場抗衡而未能走出一條更開放平等及共存的道路。這樣即使成事亦可能只不過是又一次改朝換代的努力,並未能逃離權力爭遂的死局。更有甚者,這是否更加確認了不同意見之間互相排斥的必然性。是否更加遠離了我心底對互相確認並尋找共容共存的理想的渴望呢?但回頭再想,即使堅持以一個全方位開放的姿態出現,是否又真正的走向平等呢?具體地考慮現今社會現況,又一個「開放客觀」不作任何篩選的廣播渠道其實只不過又重覆了大社會上對相對弱勢者的壓抑,並未能為他們提供一個更加寛闊的發聲展示空間。再者,在一個要求積極投入及參與的群組中隱去我自己的立場及對事物的意見,又是否把自己置身於一個異於常人的超然位置呢?這姿態一被確立,我又可如何展示對公共空間的參與實為任何人都可能的行為呢?烟霧散去,眼前只剩一片漆黑混沌。思維就在這漆黑中忽左忽右,忽上忽下,四維亂蠕之際,眼前的漆黑映出了水仙孽子帶著傲氣的面容。正想跟衪說我正在思索著一個,唉…………………說不清多少個問題,想跟衪說先別打亂我的思緒。我看似已知我心意卻又不加理會自顧自地說著:「By the end, God no longer speaks or intervenes directly, and human beings can achieve the integration and wholeness for which they long only by coming to terms with their own natures, their own crimes, grief and resentment. It is a struggle in which we may never fully succeed, but only if it is undertaken can we become a source of blessing to the world and to others.」。我似懂非懂但又希望反駁地跟衪說:「如果攪唔清楚,咪好容易俾行動成為左目的而目的就係要行動囉?咁咪跌左入 circular logic 的 paradox 度囉?」衪似笑非笑地回應:「唉,果然悟性不足,you act, and you know why you act, but you don’t know why you know that you know what you should do.」「喂喂喂,袮係唔係答緊我咖,袮越講我越唔明喎!」 「When you realize there is something you don’t understand, then you’re generally on the right path to understanding all kind of things.」說完之後,衪亦不等我回應就隱身進入漆黑之中及給我留下了一片混沌。

於是我帶住一大堆問題,答案同答案引申的問題同P,菲,仁,森,榮,阿C,薯,怡同我聚埋再傾有關廣播台的問題。會中除基本概念及運作上的討論外,我提出了有關保留最後決定權或完全開放的考慮,引發了一大堆的討論。各人都先後講過自己的睇法同態度。提出過的款式大致有,由頭闊到落腳的直筒;先窄後闊的喇叭;先闊後窄的蘿蔔同忽闊忽窄的亞米巴。除左榮傾向完全開放之外,其他朋友都傾向有一定程度的保留。但係保留的程度同方法以及之前講的先後考慮就百花齊放各有不同喇。會上大家都基本上清楚表達左對廣播台有一定程度的興趣同對以上問題的諗法,但在尋求共識方面則力度未足,未能即時完全磨合。但因時間關係,唯有約會再傾。最後亦提出左希望大家在下次聚會之前除左諗以上問題之外都可以諗諗廣播台的定名,形象設計同硬件的佩備。

再聚當日,P,菲,仁,森,阿C,薯同我再聚八樓。今次按下了上次未能完全磨合的問題,嘗試先處理其他技術性及比較容易處理的問題。首先,關於廣播台形象同硬件佩置方面,經過一大輪的討論後,決定用部比較小型的發電機推三部放在視線水平十四吋電視同時播放一條片。亦都提過最後的裝置安排須要考慮整體的可流動性的問題同埋須要造到三至四個人手都可以處理的設計。有關分別成立編輯小組同行動小組的問題,大家都比較傾向聚埋一齊傾題材同攪片,唔太想再分小組處理。至於定名問題,flow左一大輪,提出左十幾名。最後未能即時選擇,所以決定將佢出mail攪個我地自己的網上投票。亦都決定左個台大約在十二月尾近聖誕時段開台。跟住,約左十一月六號星期四續會。最後提過希望下次會前已可在網上決定左個台名,同埋希望大家都分別諗定開台第一階段果「十三輯」專輯點攪作下次會傾埋就可以開工。

憑我的記憶,之前討論過的大體應該都已提及。不過如有任何遺漏,希望大家幫忙補足。

太利

在路上 – 第二回
眾融之路,縱容之路

十一月六日聚會之後纏繞住一個問題,究竟 not my channel要行o既係一條眾融之路定係縱容之路呢?我諗係我自己o既主觀投射或者渴望,初初仁提出o既時候我聽到o既係縱容。直到後來被P指正同再聽清楚先攪清楚原來大家講緊o既係眾融。而家我諗緊o既係究竟縱容會唔會同可唔可以係眾容o既前題呢?o係八樓近年o既討論或者關懷裹面經常都會出現有關家或者家園o既講法。我諗大家都會明白呢種家或者家園o既講法並唔只係講緊血緣或者親屬關係o既家而係講緊一個寬廣意義o既家園。我經常都會諗,其實當大家o係度講緊家或者家園o既時候其實係諗緊或者想像緊乜野呢?呢種家園o既想像會唔會係渴望緊一個[我]會被接受/縱容而再發展o既地方呢?但係一個群體如果只有單向同迴避他人影響o既話,咁家園o既凝聚必然唔能夠形成。所以,一個雙向或多向同願意互相影響o既取態有須要成為一個群聚家園o既基礎。再進而延伸想像,呢一個基礎會唔會係打造眾融之路同建立一個大家想像中o既家園o既其中一條可行之路呢?彷似一個順理成章o既講法,但係我諗其中重有好多未知o既轉折。例如互相縱容之間個條線應該畫o係邊度呢?如果大家o既底線唔同,咁又可以點樣處理呢?係唔係可以期望大家o係互相影響之下形成共融o既可能呢?

“啊欠。喂!你唔係話寫會議記錄o既咩。做乜又o係度發up風呀。”水仙孽子就係個種鐘意o係D咁o既時候彈出o離攪你o既朋友。

“我只不過想………”

“你只不過想掍到一個可以接受同縱容你去渲洩你o個一大堆古零精怪o既諗法o既地方o姐!”

維怡o係度寫緊社運電影節o既介紹,”呀,用咩o離介紹Zapatista條Storm in the mountain好呢?好,就呢句啦。”。而個句野就係,’讓我們一起行進,我們就是大地的顏色。”

“係………不過我都唔係只係掍緊一個只係我自己可以縱容o既地方。自潰雖然過癮,不過都總係欠缺緊D野o既。”我心諗,成機插你個自戀怪一野先。

佢好似知我想點咁,”得得得,不過係唔係不斷o係度吹水就OK,就唔洗做呀。”

“我………”。都未有機會應佢,佢就已經走左佬。呀,你條友,算你走得快。不過都o岩o既,剩係吹水就吹天花龍鳳,做就做到唔湯唔水就的確唔係好掂o既。

好話說十一月六號晚,街頭獨立頻道o係八樓再聚。傾左一大堆運作上o既野。

第1, 經過左去蕪存菁然後再不限次數o既投票之後,終於決定左個英文名係’not my channel’。至於中文名就剩番兩個,分別係’非__頻道’同’眾融頻道’。o係菲頗唔鍾意眾容,努力遊說,借助外力(掍當時o係八樓o既離同L俾意見,不過佢地都唔o采我地),call埋不在場o既榮同薯之後,票數仍然係六比六,不分勝負。於是我就提出左,我地在場有八個人,不如我唔投票而大家一人投一票咁就可以必然分出勝負啦。跟住菲提出不如投埋反對票啦。咁o係大家都覺得可行o既情況之下,決定性o既投票就開始啦。而結果就係,’眾融頻道’有六票贊成兩票反對而‘非__頻道’就有一票贊成。咁大局已定啦。但係當我再問菲係唔係真係好唔可以接受’眾融頻道’呢個名o既時候。佢就話佢其實覺得呢個名都幾難聽,但係大家意願係咁,其實佢都接受。呢個位我真係覺菲好鬼死正。點解?唔知呀。講唔清。不過真係好掂。再諗再諗。言歸正傳,即係話我地決定左個頻道個名係’not my channel眾融頻道’。

第2, 個頻道o既設計方面o係大家flow左一大堆idea之後,就由阿仁番去度度個初稿下次再傾同決定。至於idea就有:
-要多D黑色
-圖像化
-人拖人
-一D野包住一D野
-人身電視頭
-蕉皮包蕉
-包皮包九
-花包香腸
-上闊下窄o既漏斗
-電視伸出或伸入D野
-碎肉機
-黑色球體
-黑色球體上面有個電視螢光幕o既C字形o既圖像化設計
-黑色球體上面寫住”nmc”同”眾”字同埋o係度融緊
-滴緊野o既黑色球體
-黑框眼鏡
-黑色o既眼睛
-黑色乳頭
另外亦都提過Logo設計可能有須要有選擇性咁用唔晒上面o既idea。但係o係個台o既宣傳trailer度就可以盡量融合呢D idea。

第3, 器材方面決定左以下o既選擇,至於個站台o既setup同設計就因未有時間傾所以就大家各自番去諗諗下次聚會再傾同落實。
-Kawasaki GA1400A發電機一部
-十四吋電視三部
-有monitor DVD player一部
-一入三出AV box一個
除左發電機之外,其他野都未有詳細實料,所以P同森就負責分別去check埋電視,DVD player同AV box o既料下次帶番o離再決定。都提過電視須要問清楚用幾多Watt電。

第4, 每次街站我地自己製作o既半小時專輯方面就提左以下o既idea:
-SM混音
-旺角街頭
-同性戀在中學
-中學生被禁慾
-單親中心婦女訪問
-障礙之都
-居大
-Super School
-區選後話

至於製作組方面大家都比較傾向一齊傾完然後再睇下邊個有興趣負責製作。
另外大家都講旖下自己諗住可以同想參與o既部份:
菲:一齊傾野
怡:盡量一齊傾
仁:傾拍剪
我:九up,做野
森:九up,擔抬
業:居大,Super School
阿C:冇所謂,有咩要幫就幫
P:九up加泥工
跟住大家都flow左D有關旺角街頭呢個專輯o既野,不過因為時間關係,都係要下次再傾。

最後約左十一月十四號八點八樓再聚再傾。

“喂喂喂,五點啦,天光啦,攪掂未呀!捨得目訓未呀!”

咦,係水仙孽子定係怡呢?不過,是但啦,都差唔多啦。好,大家十四號見啦。早抖!

太利
十一月八

在路上 – 第三回

眾融頻道not my channel又經過幾次聚會之後,再傾實左以下幾點:

器材方面落實左揀以下器材:
Kawasaki GA1400A發電機一部
有monitor o既Shinco DVD player一部
一入三出AV box一個
十四吋Skyworth電視四部
不過離報料話先達附近開左間中資集團o既電器大鋪賣得好平。本來我到話集團大鋪都有D保留,不過諗住都去望下先啦。個日去到見到Konka十四吋都真係平D,重要有stereo。而我係鴨寮街個部Skyworth就只係得mono,諗來諗去都係唔係好受得住誘惑。所以我想提議買平D又好聲D o既Konka啦。唉…………………
“扮咩唉聲嘆氣呀,好聲DD又點呀,其實都只不過係因為資本主義o既誘惑唔係咁易就抗衡到o既。等你成日係度扮晒有睇法,又學人話身體力行又乜又物。你估你真係可以不食人間煙火呀。講少兩句,攪掂自己先同人講啦。唉………己所不達又何以服人呢?”
我大大啖咁吸左一啖煙,正想開口回應孽子。
“唔使講啦,你諗諗你食緊個支煙包住左D乜先講啦。不食人間煙火!?啍!”
“我…………………”
唉…………………我真係唔識諗,不如大家幫手諗諗佢,我地星期六決定啦。

電視台o既街頭裝置架設o係諗左幾次之後決定左:

造一個好似衣櫃咁o既有轆流動三層兩面開門o既大櫃,底層放發電機,上面兩層分別每層放兩部相反面向o既電視。而兩層o既中點分別約為5呎半同4呎4照顧一高一低o既視平線。個四度門裹面裝埋鏡,造到真係好似衣櫃咁。D門開左之後重可以好似報告板咁用來貼野。

Logo o係經過幾天花亂墜同去蕪存菁之後,決定左用一個漏斗漸變黑球o既設計。重諗住叫阿W雕個立體大Logo擺o係個衣櫃頂做招牌。重諗住用個Logo印T恤掛o係個衣櫃度。又諗住攪D貼紙o係個櫃度加埋D唔關事o既貼紙一齊週圍貼,扮晒真係好似屋企個衣櫃咁。仁提議搵一大堆漏斗同黑波亂咁掛o係個櫃度。重諗到話開台前個一兩個禮拜用一大堆漏斗同黑波擺就咁擺o係西洋菜街。同期就造D 簡單到得個Logo,台名同開台日子同時段o既Poster同單張o係旺角附近週圍散,做吓宣傳。我補充左簡單唔知做乜都好呀,不過最緊要都係要型。

老菲提到明重未攪掂Video Power部DVD Recorder,重好似唔係好攪得掂咁。於是傾左我去搵吓明睇吓咩環境同埋幫唔幫到手。另外,如果唔好彩,要落街都重未攪得掂就播住DV帶頂住先,再諗對策。菲又提供左一個可行方案,就係出去搵鋪頭過碟,應該可以一百蚊隻攪掂。重有就係我會問吓薯有冇計。

Video Power每次會支付o既五百蚊放影費方面,o係我o既死埋一面o既固執同菲o既點醒之後,決定我地會儲起D錢用來資助拍攝所須o既材料費用。實際資助o既金額就會o係以我地當前有幾多錢o既前題底下具體情況具體傾同決定。但係只應該係材料費用而唔可以係人工,因為我始終覺得有付出o既投入係十分重要o既一件事。如果冇工資就唔會做o既話…………………我十分有保留。

電視台Trailer方面,業o既黑波彈彈西洋菜已經試拍左九萬呎菲林揀左三個shot試剪左一段,不過畫面質素唔係好得所以要再拍再剪。最難攪就係要彈到個波波直上直落同埋搵到個理想o既拍攝距離。不過業話試過上次之後有信心搵到理想距離,不過要控制到個波波就重有D困難。可能都要靠試到得為止。另外阿C條Animation Trailer就重蘊釀緊,可能要遲D先得。

Feature方面,仁條旺角街頭暫時未開工,基本上都有腹稿,應該都冇乜問題。不過都因為未開工,所以其實係未知有冇問題。菲提議條SM混音其實係想以SM混音裹面o既作者為主體。同埋希望以D相對冇咁清楚SM混音製作o既朋友o既角度去拍。所最後提議左搵阿C同薯拍,菲就會俾佢為SM混音發佈剪個條片佢地最reference。

其他短片方面,傾過可以用o既有:
菲o既SM混音發佈MV
菲o既我們的星期天
薯應該會攪o既社運電影節宣傳片
路向朋友o既短片(不過要先徵求個位朋友同大雄o既同意)
業會問吓居大同學有冇片可以播同想播
狗o既工人聖誕快樂
我會問吓齊有冇興趣用佢D相攪條片出來

另外,大家都同意都係時候o係圍內宣傳吓個台同廣泛徵集片源。我會試吓撩D野出來俾大家睇再傳出去。不過呢度又講到…………………Censor o既問題。究竟我地點同人講好呢?我地又未做到來者不拒,但係亦都搵唔到個簡單o既講法去講清楚我地o既擇偶條件。咁點算好呢?我地o既情況只可以去到具體情況具體傾。
“咁咪有個句講個句囉!其實唔單只資本主義與時並進啦。就算左派都由被壓迫剝削o既人民變成勞動人民變成工人變成農民又變成工人…………………啦。大家都只不過係摸住石頭過河o者。不過人地鍾意玩包裝,所以玩到而家咁o既款。你既然唔鍾意而家呢個款又話唔鍾意包裝,咁咪唔好包囉。其實,o係人o既認知可能同局限裹面,既定同必然o既真理可唔可能被認知都唔知啦。咁又使唔使咁緊張要搵到一個完美不變o既理念呢?諗咁多,呢樣唔得,果樣唔掂。到不如勇敢D,拋出去,面對可能o既錯折,容讓自己成長,再行前一步,再走近一步啦。”
孽子真係唔單只係一個孽子,簡直就係一個爛仔。或者應該話佢本來就係一個爛仔。不過呢排佢行親埋來玩親野我就梗係唔知應該或者可以點回應。
咁唯有就有個句講個句啦。就同人講清楚其實我地自己都諗唔掂,就就住具體情況逐次傾啦。

咦!又四點!!!大鑊!!!怡就o離唔理我咖啦。
好,係咁。星期六見

太利
十二月二

在路上 – 第三回之菲回應

其實在第一回的”在路上 “已經有回覆的諗頭,
不過見到老ter寫到水蛇春咁長,都唔知點鬼樣回覆各位

但...

到了第三回我真係唔覆唔得了~~
在此實在要先多謝”老ter”
見他充滿著感情的又詳細的會議記錄,
睇了就好似已經傾過一樣!

其實我有兩句想講的

也是不好意思的
小弟在參與這個電視台的工作上實在未可以有太多時間一齊攪
因為也想多出多些時間來
可能多左時間但係只集中做一兩樣野咁...
現時只能盡少少力去一齊傾
而實務工作方面都可能會比較少的
在之前幾次電視台糕層的會議中
我係傾得好開心的(唔知有無人會發覺呢!)

因為好奇怪的....
不知何解在這個組合上
好覺得傾得好舒服
我們沒有打打剎剎的討論會議
但起碼我可好輕鬆的把我想像說出來
可能在某些事件上各人的立場意見未必一致
但好感覺到他在聽緊我的想法
他在尊重她的意見,他的意見可能無聊但不介意地說出來再傾傾
沒有人要用手段/手法去主導其他人而強勢地去達到自己的想法

總之....正啦!

無乜講啦

呀...

仁你d野越來越正呀!
業都係呀!

回應老ter話我點醒了佢?
其實都只不過是大家補充補足

另外..

路向朋友o既短片
我只是要先徵求個位朋友的同意就可
是不用大雄同意的,因為此片與他無關的!
因為是路向朋友仔自己的作品!

謝...

...fei

在路上 – 第四回
電視台有好多種睇法,眾融頻道 not my channel。
小學果時唔見左本手冊,眾融頻道 not my channel。
嘟唔知應該點拍,眾融頻道 not my channel。
唔好當我冇到,眾融頻道 not my channel。

十二月十六晚八點
除P因考試同榮事忙外,一眾眾融友再聚八樓續傾眾融事宜。

仁條旺角街頭將再加上自己友訪問有關眾融頻道o既感想同聯想,今晚會後仁號召大家聽晚上八樓俾佢拍D野攪埋條片。菲因為聽晚唔得閒所以就今晚會後同仁上天台同後來o係後樓梯攪掂左。仁就要努力o係呢個禮拜起埋條片俾菲做master啦。

業條Trailer已經基本上攪好啦。不過重要加埋個logo同台名。Deadline嘟一樣啦。

仁森業的攪左幾條超短超過癮o既廣告片。嘩嘩嘩,掂呀!要o黎擺o係D片同片o既中間,勁呀!

薯條社運電影節廣告就因為薯努力緊份電影節單張所以仲排緊期,如果趕唔切開台日就等第二次先出街。

傾好左開台日o既選片:
仁o既旺角街頭
狗o既工人聖誕快樂
Viki o既鐵馬聯想曲
(Viki要求音響方面要做好少少。呢樣應該係可行o既,不過等試左機再決定)
路向祥仔o既片
怡o既訪問居大同學阿璇,阿全同Matthew o既片
再加上Trailer同自家廣告應該有成八十幾分鍾。

其他片源方面:

Viki有打算剪條629音樂會o既片。

菲提出自助組織中心既有o既網上電視台已經有同中心裡o既組織製作緊一D齋talk節目,菲嘟有興趣同其中一D我地對佢地o既議題有興趣o既組織傾下睇下有冇合作o既可能,例如,有機生活同不示弱女人咁。我就覺得呢個提議好正,不過再講清楚D就係因為我對D大佬檔o既片面印象同認識,我就唔係好有意慾同中心合作。至於個別組織就梗係好啦。不過我覺得o係傾o既時候嘟要清楚俾人地知道我地對佢地組織o既involvement唔可能太大。可能只係去到錄像技術支援同發放咁啦。咁呢壇野會由老菲,鳳???(咦!乜鳳仲可以分o到身o架?唔通鳳唔係鳳而係火鳳凰?)同我去跟。

菲亦嘟提到除左主動出去揾可能合作o既團體之外,其實嘟可以就番我地各人自己已有o既參與同網絡去發掘下再多D o既可能性。例如,薯同居大video班o既同學同埋佢自己o既同學同朋友,仁同佢o既同學同朋友,業同居權朋友,我透維怡同家園o既朋友,阿C同青年公社同佢自己o既同學同朋友,鳳(又係鳳???)同鳳同豪哥等等等等等。呢方面就要大家各自努力啦!

維怡提供左一D已有同可以播o既片:
鯉魚門系列:-
1 跟隨你們的腳步 (10 min) 怡
2 看不見的風光 (15 min) 怡
3 畢業記念冊 (15 min) 怡
居權系列:-
1 訪問居大同學阿璇,阿全同Matthew (22 min) 怡
2 何處是吾家 (23 min) 雲 (要徵求雲同意)
3 天黑‧白頭 (5 min) 怡
4 大量 Viki (要徵求Viki同意)
灣仔系列:-
1 家在重建區 (10 min) 阿John
2 風箏 (20 min) 超哥
3 行動片 (18 min) May姐
4 美華洋服 (22 min)
其他:-
1 女聲萬人迷 (4 min)
2 動畫 Derek
3 六四廿三 (10 min) Eric (要徵求Eric同意)
4 SM混音 (17 min) 菲
5 垃圾之光 (20 min) 怡
6 何家園開放日 (20 min) Benny
7 基本生活保障 (20 min) 怡
8 反戰示威 怡 (未得)
9 將軍澳公共空間 Joe (未得)
10 荃灣家園夢碎史 輝哥 (未得)
11 茶果嶺之旅 怡 (未得)

另外,仁同薯嘟分別提出左製作連續記錄片同連續劇o既意見。仁更已有拍攝一D朋友o既日常生活o既記錄o既想像。傾下傾下,寶同阿C講到其實可以o係網上開個留言版徵求chain story型式o既空中小說,跟住我地就可以陸續將個故仔改編拍成片集以連續劇o既型式播出。呢個提法嘟好正,不過我估要先等八樓個網站OK同埋要等狗同雄夾一夾個做法,firm左個可行性先。同埋我覺得重有一樣野要確定o既就係如果我地開左個壇同人講話會拍個故仔出o黎o既話,就真係要去拍囉。

講開網站,順勢就問埋狗關於擺片上網o既問題。跟住發現重有D問題同可能性要先攪清楚:
一:網站o既空間足唔足夠擺咁多片呢?
二:可唔可能做到streaming video呢?
三:如果做到streaming,咁D片需唔需要縮細呢?
四:上網o既片要用番Mpeg1 o既file,咁要睇下部DVD Writer可唔可以燒到VCD format。

器材方面基本上已經買齊,只等KK造好個櫃運過八樓就可以裝機試機。大家約左o係KK可以o既前提之下大家十二月廿四號晚o係八樓裝機試機。老菲會去confirm KK廿四號可唔可以起到個櫃同埋問埋佢須唔須要預支左D材料錢先。

裝飾個櫃方面就決定左由我負責印一批個台o既logo o既貼紙再加上大家各自去買張自己鍾意o既貼紙o係開台日帶落街一路播野一路貼野,重可以俾週圍D街坊玩埋一份。

T-Shirt方面因絲網o既局限,要麻煩仁再執個造網用o既logo出o黎。跟住就由森去攪個網同D原子漿。

仁,森一再提出係唔係作番隻主題曲或者Jingle俾個台呢?…………………好,好呀,大家一齊諗啦。

好,大約係咁上下啦。

咦,乜今晚咁靜o既,孽子竟然唔出o黎攪我o既???
“哼,早D目訓啦你。成日以為自己好勁。睇你遲D點死!”
哈!我死得你嘟唔係好過癮佐喎!
“其實我唔得閒理你呀。我o係度諗緊以前o既街站,跟住無人駕駛,人民論壇到今日o既眾融頻道,走過一條黠樣o既路,又走向緊一條乜野o既想像呢?我o係度諗緊當初街站源起o既Sunny而家面前又係一條點樣o既路呢?”
唔…………………冇錯,我地的確講唔清亦都唔可以絕對肯定行緊o既係一條點樣o既路。但係,我心信就正因為我重有機會重有能力行上呢條未知o既路,我先真係有可能有心力走向融合。當晚Sunny話從此脫離o既時候我同佢講過話,你想抖下就抖下啦,不過我等你。我估我地始終都要走在路上,清楚地踏出自己o既步伐,再寄望同其他朋友o既相遇聚合,再o係不斷互相磨鍊之下真正揾出一條可共容共勉o既路先至真正可以挽手踏出血路呀。等必須要等,諗亦必須要諗,但係與此同時,路亦必須要行落去。終點我的確睇唔到亦都唔知o係邊度,但係眼前我睇到有可行o既路,點解唔就踏出一步呢?況且,而家有班朋友可以一齊踏出呢一步,淨係呢樣已經係得著同幸運啦!!!!!!!

以無道為我道,眾融頻道,channel for the channelless,not my channel

多謝大家
太利

想起《大屠殺》最後一句,遇到你真好。

半桶水的support

9筒。
+大家遇到大家真好。
好多野係要大家一齊去成就架!
唔好睇少自己。

小心–
隨時變火鳳凰既彩鳳

火鳳凰!?

我對於大家一齊去成就這幾個字有點保留的…

邊個大家一齊呢?
或者我用大家呢兩個字會小心多點的暫時眾融頻道合作的朋友們其實又會覺得有幾大家呢?
不過大家不大家我暫時沒去想了

“做0野”似乎是現在著緊的問題!
又或者一路做一路諗吧!

老ter的mail有點補充
在街上播放當日有無需要放一張節目(影片)播放時間表?也可讓一些人知道有乜片睇又或者有人當看到原來在睇片時之前曾播過一些佢又想睇的片咁佢也可以提出,再播一次

覺得點???

另外祥仔的片個時間係 20:09

24/ 12 原來個日我要去”飲”
如果各位唔能夠改25/12咁我就唔去飲啦如果改到我先去啦!

再另外有無人還有時間比我呢?我想拍Trailer需要演員2-3位2男1女時間未定(因為未諗好)諗好再mail出來

幫忙者會獲得本人熱吻一大個
(嘩….)

(最唔希望有半桶水的support)
…fei

各位、菲仔:

sorry!我講漏左,應該係:
有好多野可能係要大家去成就,
而唔一定係一個人好就得!
咁個個人都會好無奈。
我而家就諗,都唔諗有幾一齊喇..
因為永遠都無一把尺可以去量度有幾一齊,
如果無一定既,咁就一路試落去,
可能唔會有一個結果,但…我永遠都唔知,
就可能有可能。
而且大家又指邊個呢?係唔係要咁清楚呢?
你想既,就會有可能係大家。

哎呀!

菲,搵演員呀..^ ^ 我可以扮女仔架!

為了保險起見
加上一句:
果d我覺得應該無問題的片
意思是果d人應該贊成的
但要問
咁要播之前
記得要問喎

1/4桶欄木支持

菲菲
我諗”大家/我們”從來都是一個虛詞
一個荒蕪的花園
是靠大家的努力去灌溉,還有傻傻地相信它可以成就一個花園
還有傻傻地相信只要努力,這個花園隨時可以接收其他生物進入其生物鏈
因此,我想”大家/我們”是一種我們願意為之去努力的信念
而從來不是就著事實而言的
但是如果從一開始就沒有這種信念,覺得要從假設敵對(或者是對立)的狀態作起點, “大家/我們”就可能永遠不能成為事實了……

願共同努力
一起去成就各自的理想


ps昨日見到菲咁輕鬆同開心,搞到我都好開心,因為記憶中,已經很久很久沒有見到老菲這種樣子啦……

呢其我同業都咁容光換法大家有眼見啦
究竟photomontage會唔會因隊員不和而拆火呢?
我係唔係火麻仁呢?
呢d野關個台乜事呢?
我打呢風mail上泥做乜呢?
我係唔係比人 門 得小呢?

火麻仁

我或者是講得不清吧!?
我只是想有一個最壞打算
但想再再實際的去做…
信念可能未必可以講得清
又或者一路做一路諗
又或者是否真的有”諗得清”呢回事呢?
但做出來的都是最實際的吧!?

ps : 真係???回光反照!?
我都希望見到妳有呢日啦!?
火麻仁/業業……唔!?
唔知講乜好!?

努力吧!

我在等你地d主題曲及者Jingle o架!

…fei仔

“打呢風mail上泥做乜”除左你自己我諗冇人可以講得清
“係唔係火麻仁,係唔係比人 門 得小呢”我都唔知

“呢d野關個台乜事呢?”就因為你會用呢個platform講你o既野(重要打中文!)

太利

眾融頻道 not my channel開台啟播宣傳mail

電視台有好多種睇法,眾融頻道 not my channel。
小學果時唔見左本手冊,眾融頻道 not my channel。
都拍到唔知拍乜好,眾融頻道 not my channel。
唔好當我地冇到,眾融頻道 not my channel。
以無道為我道,眾融頻道,channel of the channelless,not my channel。
題材唔老土,眾融頻道,not my channel
都唔知講乜好 ,眾融頻道,not my channel
條片剪極都未剪好 , 眾融頻道 not my channel
頭巾榮你咪收山唔o路 , 眾融頻道 not my channel
P幾時出黎旺角o鋪 , 眾融頻道 not my channel

各坊眾友,

八樓一小眾籌備經月,錄影力量全力支援,又一力作,眾融頻道 not my channel 街頭廣播電視台鐵定二零零三年十二月二十七日(星期六)下午五時至七時之時段於西洋菜街行人專區開台啟播,並將於往後逢星期六同一時段及地點放縱。

頻道除會放縱我們的自主錄像製作外,亦渴望可成為你製作自主錄像的發放渠道,有興趣的朋友請與我們聯絡,相約詳談。

眾融頻道 not my channel